дзякуючы якому можна:

• праверыць сваю эрудыцыю ў віктарыне “Таямніцы дома Песняра”, па выніках якой можна атрымаць “каласы”- купоны на бясплатнае наведванне філіяла “Мікалаеўшчына”
• паўдзельнічаць у стварэнні ўнікальнай паштоўкі з уласным фотаздымкам
• агучыць урыўкі з твораў Якуба Коласа і запісаць іх на кампакт-дыск

Падчас пешай экскурсіі  “Мясцінамі Коласа ў Мінску” можна будзе наведаць сядзібу музея, дзе знаходзіцца мемарыяльны дом песняра; дворык Акадэміі навук, на карысць якой Якуб Колас працаваў больш трыццаці гадоў, займаў пасаду віцэ-прэзідэнта, займаўся вывучэннем і збіраннем вуснай народнай творчасці, беларускага фальклору; прайсці да плошчы Якуба Коласа (былой Камароўскай) і ўбачыць помнік народнаму паэту і героям яго твораў работы Заіра Азгура; а затым у Цэнтральным  дзіцячым парку імя М. Горкага даведацца пра даваеннае жыццё сям’і Якуба Коласа, які амаль чатырнаццаць гадоў пражыў ва ўласным доме ў ціхім Вайсковым завулку побач са Шпітальнай вуліцай (сёння вуліца Фрунзе), а зараз гэта месца ўваходзіць у тэрыторыю знакамітага парка атракцыёнаў.

Наведаць месца дома Якуба Коласа на Старожоўцы, які сям’я паэта  арэндавала пэўны час у заможнага гаспадара Вільгельма Русецкага, і дзе знакаміты пісьменнік скончыў свае найлепшыя паэмы “Новая зямля” і “Сымон-музыка”, напісаў аповесці “У Палескай глушы”, “У глыбі Палесся”, “На прасторах жыцця”, п’есы, вершы, казкі для дзяцей, шматлікія публіцыстычныя артыкулы, больш падрабязна даведацца пра гісторыю сяброўства двух знакамітых народных паэтаў Якуба Коласа і Янку Купалу, дом якога знаходзіўся на другім беразе Свіслачы, а таксама праехаць да Мінскага астрога (Пішчалінскага замка), дзе паэт правёў тры гады ў зняволенні за ўдзел у нелегальным настаўніцкім з’ездзе; а затым,  каля Беларускага Дзяржаўнага Універсітэта, дапоўніць свае веды пра народнага песняра  як цудоўнага педагога, метадыста, выхавацеля моладзі.

• “Таямніцы дома песняра” (квэст-гульня па экспазіцыі музея)
• “Мінскія адрасы Якуба Коласа” (квэст-гульня па Мінску)
• Дзіцячыя рухавыя гульні (на інтэрактыўнай пляцоўцы “Паэтычны
  куток. Героі твораў Якуба Коласа”):“Гусі”, “Мышы”, «Замарожаныя», «Казёл», “Сонца свеціць на таго…”.

Стацыянарная выстаўка “У хвалях няспыннага руху: аўтамабільнымі шляхамі Коласа”, размешчаная ў гаражы паэта, які быў пабудаваны ў 1946 годзе, знаёміць з паўсядзённым жыццём і асобнымі знакавымі падзеямі ў жыцці Якуба Коласа ў перыяд 1936 – 1956 гг. праз прызму службовага  і ўласных аўтамабіляў.

У Якуба Коласа было шэсць аўтамабіляў, і амаль кожны з іх – новая веха, новы круг у жыцці пісьменніка –  рэпрэсіі 1930-х гадоў, якія не абыйшлі родных і блізкіх беларускага песняра, Вялікая Айчынная вайна, калі пісьменнік апошні раз бачыўся са сваім сынам Ю. К. Міцкевічам, пасляваеннае адраджэнне краіны.