“Хто я ў сучасным? Знічка…”

 

Прэзентацыя кнігі “У віры падзей” Сяргея Давідовіча

 

17 красавіка 2013 года  ў Дзяржаўным літаратурна-мемарыяльным музеі Якуба Коласа адбылася прэзентацыя кнігі “У віры падзей” беларускага паэта і мастака-жывапісца

Сяргея Давідовіча.

Сяргей Фёдаравіч Давідовіч нарадзіўся 20 ліпеня 1942 года ў вёсцы Карпілаўка Лагойскага раёна Мінскай вобласці. Юнаком пераехаў у Мінск, працаваў у праваахоўных органах (прайшоў шлях ад сержанта да палкоўніка), аднак душа яго ўвесь час імкнулася да творчасці. Ён выдаў некалькі сваіх празаічных кніг і паэтычных зборнікаў шчырай, пранікнёнай і ўзнёслай лірыкі, арыгінальнай па задуме, сюжэтна вострай, на дзіва мілагучнай і псіхалагічна дасканалай. Нездарма многія яго вершы  былі пакладзены на музыку Яўгенам Глебавым,  Ігарам Лучанком, Валерыем Івановым, Леанідам Захлеўным, і гэтыя песні гучалі далёка за межамі Беларусі (нават на сусветным фестывалі моладзі і студэнтаў на Кубе). Некаторыя свае зборнікі вершаў аўтар сам праілюстраваў.

 

Як мастак-жывапісец, С. Давідовіч працуе ў жанры тэматычнай карціны-пейзажа (“Вясна”, “Курапаты”, “Лагойшчына”, “Карпілаўка”), карціны грамадзянскай тэматыкі (“Трэба выжыць, Беларусь”, “Мама-выратавальніца”, “Чарнобыльская пастка”, “Чарнобыльскі Гулівер” і інш.). Сяргея Давідовіча цікавіць і рэлігійна-філасофская тэматыка, пошук адказу на адвечныя пытанні: хто мы, адкуль і дзеля чаго на гэтай зямлі (карціна “Дабро і зло”, вялікі трыпціх “I кожны звернецца да Бога” і інш.), тонкая псіхалогія сялянскіх узаемаадносінаў, гісторыя таталітарызму ў СССР, і, як кажа сам мастак, наш вечны боль – Чарнобыль. Чалавек дзеяння, жыццярадасны, дабразычлівы, Сяргей Фёдаравіч любіць пісаць сціплыя сцэнкі вясковага жыцця, напоўненыя пранікнёным лірызмам,тонкім гумарам, аптымізмам і вялікай любоўю да чалавека (“Залатое вяселле”, “Маладзік”, “Рысакі”, “Валачобнікі” і інш.). У яго тэматычных карцінах удала спалучыліся вобразнасць, алегарычнасць, глыбокае веданне тэмы і пераканалая грамадзянская пазіцыя аўтара. Мастак пазбягае нядобрай карыкатурнасці, яго карціны поўныя шчырай увагі да радавых падзей і вызначаюцца трапнасцю іх ацэнкі, і таму яны так вабяць гледача.

Ганаровымі гасцямі мерапрыемства былі народная артыстка Беларусі Марыя Захарэвіч, старшыня Мінскага аддзялення Саюза пісьменнікаў Беларусі Міхась Пазнякоў, беларускія літаратары Казімір Камейша, Алесь Марціновіч, Павел Саковіч і інш. Сапраўднай украсай вечара сталі песні пад гітару ў выкананні самога Сяргея Давідовіча.

 

 

 

 

ўсе навiны