Рэтра-кінапаказ у Доме Коласа

 "Звычайны фашызм":

рэтра-кінапаказ да Дня ўсенароднай памяці ахвяр Вялікай Айчыннай вайны

 

22 чэрвеня а 19-й гадзіне музей Якуба Коласа запрашае ўсіх аматараў кіно на рэтра-кінапаказ, прысвечаны Дню ўсенароднай памяці ахвяр Вялікай Айчыннай вайны.       Вашай ўвазе будзе прадстаўлены адзін з найбольш арыгінальных твораў аўтарскага савецкага кінематографа – дакументальны фільм "Звычайны фашызм" (рэж. Міхаіл Ром, 1965 г.)

     Па ўзгадках рэжысёра, першапачатковым штуршком для нараджэння фільма стала яго размова з маладымі людзьмі, якія не памяталі вайны, ведалі пра яе выключна па аповедах дарослых, па кнігах і мастацкіх фільмах і для якіх фашызм быў нечым абстрактным і, магчыма, нават не настолькі небяспечным і страшным, як пра яго пісалі і гаварылі.

 

     Важнасць тэмы, неабходнасць перадаць гледачу свае думкі заахвоцілі М.Рома самога выступіць з каментарыямі. Гэта дазволіла выбудаваць карціну як аўтарскае філасофскае разважанне, якое, як падкрэсліваў рэжысёр, рассоўвала рамкі дакументальнага матэрыялу, прымушаючы думаць пра лёс чалавека і чалавецтва ў самым шырокім аспекце, як гістарычным, так і сучасным. Спалучэнне маналогу, які дэманструе пачуцці самога аўтара, з эмацыйна ўражлівым мастацкім мантажом прывяло да таго, што фільм прымушаў гледачоў асэнсоўваць і перажываць трагічныя падзеі мінулага не проста як факты гісторыі, а як заклік не дапусціць нічога падобнага ў сучаснасці.

 

     Уваход на прагляд вольны!

САРДЭЧНА ЗАПРАШАЕМ!

Тэл. для даведак: (017) 284 17 02

 

ўсе навiны